估唔到~~我呢個病竟然令到我病足一個星期有"特"~~
睇醫生都睇左兩次~~
一講起睇醫生,真係火都黎埋~~
話說我年初四已經開始發病,但諗住冇乜事啦~~點知過左兩日喉嚨仲係好痛,咁就係星期三下午去左睇醫生。
通常呢d傷風咳,醫生都係開3日藥~~加上今次醫生冇開抗生素俾我~~食藥食到星期六,見好返少少~~果晚又咁岩係婆婆既生日(連團拜)晚飯,咪盡情咁食囉!!點知就"lai"野啦~~
星期六晚返屋企時都知唔對路,喉嚨又開始勁勁勁痛~~當晚我都好醒咁,有乜對喉嚨好既野都食晒咁制~~點知都係唔得!!
到左星期日,男友見我病左咁耐冇乜去過邊到,就車左我去西賈行下玩下狗仔~~講真,果日喉嚨仲係痛架,所以都冇乜點食野,只係下午食左個brunch(白汁意粉),而夜晚就食粥。
其實一直個喉嚨都未好過,又痛又咳~~亞媽見我咁,就叫我星期一請假睇下醫生休息下啦~~點知,就俾個醫生激到我喊!!
好奇怪既,我由細到大都好怕睇醫生,一見到醫生我就好驚~~但你問我驚d乜,我又唔知喎,總之就係想講既野又唔記得講咁上下啦!!
今次因為我貪方便,去左自己屋苑果個醫生到睇~~一入到去醫生房:
醫:「你有乜事呀?」
我:「我上星期開始發燒,之後又咳又喉嚨痛,仲有少少鼻水添...之前睇過醫生食左藥,但好似冇乜好轉。」
醫:「乜野冇乜好轉呀?....傷風咳呀?」(我心諗:大佬,緊係傷風咳啦,唔通我發燒燒成個星期先黎睇你咩)
醫:「咁你咳兩聲黎聽下啦 (咳...)再咳多次 (咳...)再咳大聲d啦 (咳...咳...)」
之後佢就聽我背脊同照我喉嚨...
醫:「得啦,你冇乜野姐,係你唔介口先病咁耐。」
我:「下,我已經好小心飲食啦~~都冇乜食d油膩煎炸野。」
醫:「咁你琴日食左乜做早餐丫?」
我:「唔係好記得喎,好似冇食野...」
醫:「咁午餐呢?」
我:「食左意粉囉...」
醫:「咁咪唔岩囉!」我:「下,意粉都唔得??」醫:「意粉要焗架麻!」
我:「我食果隻好似唔係焗果喎...」
(最精景既一句)醫:「唔通食白"sharp"架!」
(我開始俾佢話到眼濕濕)我:「唔係,係白汁意粉姐。」
醫:「咁咪係囉,有芝士架麻!」 (我心諗:大佬呀,白汁意粉唔一定有芝士架,都short既)
(佢見我冇再答佢,又問)醫:「咁有冇食生果丫?」
我:「有....蘋果囉。」
醫:「又唔岩啦,唔可以食蘋果架!」 (當時我d眼淚冇停過咁流)
我:「下,乜唔食得既咩?咁可以食d乜野生果呢?」 (其實我指既食蘋果,都只係一兩粒已切細細粒既蘋果,真係唔知有冇1/10個蘋果)
醫:「乜生果都唔食得!」 (我當時O晒咀啦~~仲可以講d乜呢,而同一時間,我成面都係眼淚,為有問佢囉紙巾)
我:「醫生,我可唔可以要張紙巾呀?」
醫:「呢,係果到~~自己攞,鍾意要幾多攞幾多!」
(到最後...)醫:「總之你冇乜事既,係你唔介口姐!」
而我就只好「哦」一聲咁出返去...但我個心就諗,你成日話我唔介口,咁係咪我介口就唔會再病丫,係既話,你就唔駛開藥俾我啦!
其實醫生同病人講解有d乜野食得唔食得係岩,但呢個醫生就長期用呢兩個樣同我講野。我睇咁耐醫生,都係第一次遇到d咁既人~~
唔好話普通人丫,佢身為醫生就更加唔應該用咁既態度同病人講野!醫生唔可以單單識開藥就算架,仲要照顧埋病人既心理狀況架麻~~正所謂「七分病情三分心理」,如果我係睇唔開既,佢就算開多多藥俾我都無效啦! 仲要係我不停咁喊,佢都可以視若無睹,真係....
所以我決定唔介口,睇下係咪唔介口就好唔返~~如果我好得返既,就拆佢招牌!(不過我都唔會再去佢果間診所,仲要叫埋我屋企人都唔好去)